Kërkesa e Presidentes së Republikës së Kosovës, Vjosa Osmani në Këshillin e Sigurimit të OKB-së, për miratimin e një rezolutë me të cilën do të ndëshkohej Serbia për sulmin terrorist në Banjskë, po vlerësohet si hap i mirë nga njohës të rrethanave politike. Megjithatë, ata janë skeptikë se mund të ndodhë miratimi i një rezolute të tillë, pasi kjo do të kundërshtohej nga Rusia dhe Kina.

Adresimi i mbrëmshëm i presidentes Vjosa Osmani, në Këshillin e Sigurimit të Kombeve të Bashkuara, po vlerësohet si mjaft i mirë nga njohës të marrëdhënieve ndërkombëtare dhe analistë politikë. Edhe kërkesa e saj për një rezolutë të OKB-së kundër agresionit të fundit të Serbisë, nga profesori universitar, Dritëro Arifi, po vlerësohet si një provokim i zgjuar nga ana e presidentes.

“Kjo është një kërkesë e zgjuar e presidentes që ta sfidojë Këshillin e Sigurimit të OKB-së për një rezolutat të tillë. Miratimi i saj është i vështirë pasi duhet pajtimi i Rusisë dhe Kinës. Sepse, edhe Rusia e ka shkelur Kartën e OKB-së dhe të drejtën ndërkombëtare në mënyrë flagrante, e përkundër kësaj Këshilli i Sigurimit ende nuk ndërmerr asgjë. Pra, kërkesa e presidentes është hap i mirë politik, por që në përmbajtje nuk besoj se do të ndryshojë diçka”, tha ai.

Prezantimin e presidentes në Këshillin e Sigurimit të OKB-së e vlerëson si të mirë edhe analisti politik, Artan Muhaxhiri, por për miratimin e rezolutës thotë se vështirë se mund të ndodhë.

“Nuk ka gjasa që të realizohet kjo kërkesë për rezolutë, pasi balancat e pushteteve në Kombet e Bashkuara nuk janë në favor të Kosovës, por gjithsesi mjafton që të gjitha shtetet demokratike janë në anën e Kosovës sa i përket veriut dhe kjo është një përkrahje e madhe e cila duhet të shfrytëzohet nga Kosova, e cila duhet ta dëshmojë veten si vend demokratik, ndërsa ta demaskoj Serbinë si një vend antidemokratik”, tha Muhaxhiri.

Gjatë shqyrtimit të raportit në Këshillin e Sigurimit, për situatën në Kosovë, për periudhën mars-shtator 2023, përfaqësuesi i SHBA-së kërkoi ekstradimin e personave të dyshuar në rastin e Banjskës, ndërsa përfaqësuesja e Francës tha se Serbia dhe Kosova duhet të punojnë për të dalë nga situata në të cilën janë, pas sulmit të 24 shtatorit. /rtk/